Na cociña, coma na banda deseñada, o tempo, a expresión e a creatividade son ingredientes esenciais. Mentres unha receita marca os pasos que levan á maxia dun prato, unha viñeta acompáñanos polos camiños da imaxinación. Mais que pasa cando mesturamos ambos mundos?

A banda deseñada está a gañar protagonismo como ferramenta didáctica e inspiradora no ámbito gastronómico. Dende manuais de receitas ilustrados ata historias culinarias autobiográficas, o noveno arte está a cociñar novas formas de contar, aprender e saborear.

No noso centro, o CIFP Paseo das Pontes, podes atopar moitos exemplos deliciosos como por exemplo, Let’s Make Ramen! de Hugh Amano e Sarah Becan, unha guía paso a paso que combina receitas con humor e cultura xaponesa, ideal para comprender procesos culinarios como a elaboración de ramen, dumplings ou noodles dun xeito visual e atractivo; ou outros libros como La cantina de medianoche de Yaro Abe, un manga ambientado nunha taberna de Tokyo aberta de madrugada, onde cada prato serve de fío condutor para historias íntimas entre personaxes entrañables. Unha oda ao poder emocional da comida.

Estes títulos, ademais de entreter, son ferramentas pedagóxicas potentes. Na aula, a banda deseñada pode ser usada para traballar as receitas coma guións gráficos, reforzar a comprensión dos procesos culinarios e desenvolver a creatividade do alumnado. Imaxinádevos ilustrar paso a paso como se fai un caldo galego ou unha empanada: expresión artística e técnica culinaria da man.

En tempos onde o visual e o narrativo converxen, a cociña pode atopar na banda deseñada unha aliada inesperada para innovar, aprender e emocionarse. Porque, ao fin e ao cabo, cociñar tamén é contar historias. E que mellor maneira de facelo que con sabor… e con viñetas.